حكايات تونسيّة – التاجر الأكحل والتاجر الأبيض

يحكيو على تاجر في بلاد من البلدان ماخذ بنت عمو، حسن وجمال والزين والعقل فوق الكل. يحبها وتحبو الروح خرجت من الروح. جاء عام الخدمة كاسدة شوية في بلادهم. قال نعمر قافلة، قالها يا بنت عمي راني مسافر للبلاد الفلانية باش ندبر راسي. قاتلو اقصد ربي والي يقصد ربي عمرو ما يخيب.خلالها مونت عام على بالك اطول السفرة متاعو واركب وقعدت هي وخادمتها.
وصل لهاك البلاد الي كان ماشيلها. هاك البلاد هذيكا فاها واحد تاجر أسمر نص لون يمكن بوه حر وأمه خادم ولا يمكن العكس مسمينو التاجر الاكحل. الصنيعة متاعو كل تاجر براني يجي من بلاد أخرى يسلبو في السلعة متاعو. يدور بيه ويضيفو ويلعب معاه شطرنج وهو صنايعي. يلعب معاة على السلعة لين يخرجو منها.
التاجر وصل للمدينة والتاجر الاكحل عرضوا. قالوا الليلة عندي وألح عليه. هزو للدار وضيفو ضيافة تاع ملوك وبعد بداو يلعبوا شطرنج. في الاخر تغلب التاجر الاكحل. وبعد بقاو يتحدثوا على العايلات. لين التاجر الاكحل قالوا النساء مافيهمش امان. قالوا التاجر الابيض موش النساء الكل كيف كيف أنا عندي بنت عمي زين وتربية. وتخاطروا التجار الزوز اذا كان التاجر الاكحل يجيب أمارة من عند مرت التاجر الابيض بفكلوا رزقو الكل.
وصل التاجر الأكحل لباب الدار وتأكد أنو المرا ما تخرجش من الدار. قعد ها التاجر مطيش قدام الدار لبن أيس من خروج المرا. هوا أكاكا لين تعدات عزوزة كبيرة قتلو كي سبتك إنت هنا. قالها نحب أمارة من مولات الدار هاذي. مشات المرا الكبيرة لمولات الدار وقاتلها من ورا الباب راني مرا فقيرة وباش نعرس لبنتي عندكشي حويجة تعطيهالي. بعد أيامات مداتلها روبة. هاك التاجر هز الروبة ورجع للتاجر الابيض وفكلو سلعتو وولا خديم عندو.
بعد فترة المرا بعثت الخادمة متاعها تلوج على راجلها في ها المدينة الي سافرلها. بعد طول بحث دخلت الخادمة لحانوت فطايري ياخي لقات سيدها يخدم فميكا في حالة رثة. خرجت فيسع من الحانوت وبقات تسأل في الناس علاه ولاى في هاك الحالة وحكاولها شنوة صارلو مع التاجر الأكحل. رجعت هاك الخادمة للمرا وحكاتلها شنوا صار لراجلها. هاك المرا بعثت الخادمة شرات 100 جمل و 99 وصيف من سوق العبيد وشراتلها كسوة راجل.
سافرت المرا للمدينة وأول شخص قابلتو هو التاجر الأكحل. استدعاها على طرح شطرنج وفي وسط اللعبة غافلتو وخدرتو وربحتو وفكتلو رزقوا وشكات بيه للقاضة حبسوه ورجعت رزقها ورزق زوجها.